Shangwe la Fiesta mwaka huu linaanzia mkoani Mwanza kama ambavyo imekwishatangazwa, hakuna asiyejua Tamasha la Fiesta ni ‘show’ ya taifa, watu wa maeneo mbalimbali hukaa mkao wa kula kwani licha ya burudani ya kukata na shoka inayodondoshwa na wasanii kibao pia fursa za kibiashara hupatikana kutokana na tamasha hilo ambalo huwaleta karibu watu kutoka sehemu mbalimbali.
Tangu kuanzishwa kwake miaka 15 iliyopita kwa mara ya kwanza wakazi wa Jiji la Mwanza watapata fursa ya kushuhudia muziki wa singeli ukitamalaki katika jukwaa la Fiesta 2016 kwa kupambwa na mfalme wa muziki huo almaarufu kama Manfongo.
Wakazi wa Jiji la Dar es Salaam wanafahamu vizuri tamu ama raha ya muziki wa singeli hivyo Wanamwanza safari hii hawatahadithiwa ama kusikia kutoka kwa watu wengine, bali #Manfongo mguu kwa mguu hadi Mwanza kwenye jukwaa la kimataifa la Fiesta 2016 kukonga nyoyo za wapenda burudani jijini humo.
